大運會專用車 比亞迪供應四分一

【明報專訊】月中剛剛公布上半年業績預報，純利按年勁跌近95%嘅比亞迪（1211），昨日就宣布咗一單好消息，話佢哋已經同深圳市政府傾成咗單生意，獲得於下月舉行嘅深圳大學生運動會新能源汽車訂單，比亞迪將為大會提供300輛e6型號電動的士，同埋200輛K9型號電動巴士。

有政府生意做，比亞迪昨日股價終於止跌回升，漲2.7%去到24.3元。之但係小琴發現，深圳市政府早排都介紹咗大運會新能源汽車嘅訂購方案，係就係比亞迪有500輛嘅訂單，但原來全市投放新能源汽車總數係2011輛，餘下更大額嘅1511輛新能源汽車訂單，市政府畀晒深圳本土企業五洲龍汽車有限公司。換句話說，比亞迪所拎到嘅大運會新能源汽車訂單份額，只佔總數四分之一左右。