故宮館諮詢報告 西九局明討論

【明報專訊】時任政務司長林鄭月娥去年底未經公眾諮詢下，公布興建故宮文化博物館，引起好大爭議，西九管理局事後「補鑊」，展開為期兩個月嘅公眾諮詢。據了解，西九管理局董事局聽日會正式討論公眾諮詢嘅最終報告，最快同日表決係咪接納報告。


身兼董事局主席嘅政務司長張建宗，噚日就發表題為〈活力都會 文化樞紐〉嘅網誌，力銷故宮館，形容公眾普遍支持項目。佢透露，政府下月26至27日會同北京故宮博物院合作，首度喺香港舉辦「博物館高峰論壇」，到時世界知名博物館同各個領域嘅專家會聚首一堂，分享經驗，並討論喺科技創新年代面對嘅挑戰同機遇。


香港今年有多個大型文化藝術展覽，張建宗形容，今年係香港回歸20周年，正正提供機會畀香港同國際知名博物館合作，將世界文化珍寶匯聚喺香港展示。