豐盛公布「合作」為復牌打氣

【明報專訊】被沽空機構Glaucus指估值「荒唐」嘅豐盛控股（0607），周二已經預告咗會喺今日復牌。未知係咪想畀股東多啲信心，定係對自己股份復牌表現冇乜信心，豐盛噚晚再出多份公告，標題係「有關戰略合作協議之公布」，再睇內文，原來係同中信銀行（南京分行）訂立協議。咁究竟點樣戰略合作法呢？據通告描述，就係「就中信銀行提供組合、一站式及綜合金融服務而開展多層面合作，包括融資及信貸、投資銀行、會計管理、供應鏈金融、財富管理及資產管理」。


獲信行授信100億

讀者可能同小琴一樣，睇到呢度都仲未好知呢個合作協議係點玩法，去到通告文末終於有比較具體嘅條款，原來就係中信銀行同意向豐盛提供綜合信貸及融資限額唔少於人民幣100億元，協議期限有成兩年咁耐㗎！嗯，其實呢種授信當然係正面，但响商業社會來講都好普遍啫！唔係話好多公司會刻意強調自己得到幾多授信。豐盛上月底停牌前股價急插12%，唔知呢個公告對佢哋股東有冇起定心丸作用呢！


[小琴密語]