邵家臻探監﹕曾健超變「冤情大使」

【明報專訊】公民黨前成員、七警案「主角」曾健超（Ken）早前放棄上訴，為佢去年被裁定嘅一項襲警同兩項拒捕罪服刑，將於今個月20號出獄。社福界立法會議員邵家臻噚日去探阿Ken，透露阿Ken變咗「冤情大使」，啲獄友成日搵佢傾訴不公。


阿臻喺facebook交代探監一事，仲代阿Ken傳話，叫大家唔使掛心，佢好好，亦無悔喺雨傘運動期間嘅參與。阿臻仲透露阿Ken無申請單獨囚禁，同17個獄友一齊住，佢喺獄中負責木工，閒來讀書，仲會每日做掌上壓操fit自己。


另外，之前入稟覆核立法會議員宣誓嘅城大專業進修學院學生莫嘉傑，噚日發起遞信請願行動，遞交3600份網上具名聯署，要求社工註冊局紀律聆訊阿Ken，仲要求永遠取消阿Ken嘅社工資格。