「杜sir飯局」會好友 曾俊華結他奏《浪子心聲》

【明報專訊】特首候選人曾俊華昔日宣讀財政預算案時，鍾意喺結語借歌詞抒發感受，呢個風格似乎沿用到特首選舉。佢噚日喺facebook上載一段《杜sir飯局》影片，片中同導演杜琪峯、森美、自由黨田北俊及時事評論員李鵬飛等友好一齊食飯論政。薯片喺片尾用結他彈奏許冠傑嘅《浪子心聲》，一眾嘉賓合唱「難分真與假，人面多險詐……命裏有時終須有，命裏無時莫強求」。


合唱「命裏有時終須有」

曾俊華用過唔同歌詞抒發感受，好似《交叉點》「不信命運，但信機會」、《隨想曲》「渴望心中富有」，以及《憑著愛》「曾踏遍刺腳的彎路」等。特首選舉踏入倒數階段，今次曾俊華就彈奏《浪子心聲》，仲合唱「雷聲風雨打，何用多驚怕」，唔少網民睇片都話感動。


提起市民捐款哽咽

《杜sir飯局》一開始就係杜琪峯同資深傳媒人張寶華陪曾俊華去九龍城街市買餸，之後曾俊華喺老婆提點下親自炮製「台山糯米雞」。一眾嘉賓邊食邊論政，當薯片提起市民捐款支持時更一度哽咽。曾太即撐老公，話「佢從來做嘢都係成功嘅，我對佢有信心」。


另外，金像獎都抽曾俊華水，大玩二次創作，噚日上載今屆大會司儀鄭中基同金像女神「拍住上」嘅短片，分享對電影及金像獎嘅睇法，連「原創者」曾俊華都留言讚好。