曾因退保駁火 今現身宣傳片 周永新：非因撐林太

【明報專訊】特首候選人林鄭月娥同曾俊華選舉期間，都分頭搵咗唔少重量級支持者拍片擺上網宣傳，不過噚日出現喺林太短片中嘅主角則令好多人意外，佢就係曾經同林太公開就退休保障駁火嘅港大榮休教授周永新。短片中，兩人一同到深水埗板間房探望長者，又就退保、長者生活津貼交流意見，唔通兩人已經冰釋前嫌，家仲要現身力撐對方？
「候選人想傾，我都同意」
其實周永新過去因為政府撰寫退保研究，同時任政務司長林鄭月娥意見相左，兩人其後多次公開駁火，人盡皆知，無諗過周永新選舉期會同林太首度「reconnect」，仲一齊拍片。周永新噚日就話，「相信若果唔係因為競選，林鄭都唔會再搵我啦。」
周教授解釋，前兩日收到有參與退保委員會督導工作嘅成員電話，問有無興趣同林太一起探基層，佢強調答應並非因為支持林太，只希望候選人可多了解長者需要，「任何一個候選人想同我傾，我都同意」。被問到會否覺得畀人擺上枱，周永新就好大方話「無所謂」。林鄭競選辦噚日就強調有關探訪及短片均獲周永新同意。
中聯辦消息﹕張曉明已返港
另外，昨晚政圈不斷傳出中聯辦主任張曉明，自兩會閉幕後並無回港，疑被雙規；中聯辦消息人士澄清，張曉明兩會閉幕後已返香港，亦見過唔少香港人士，包括噚日同港區政協常委第一及第二召集人陳永棋和吳光正見面，今天亦會出席公開場合。