曾俊華講湊仔經 食薯片造型飯盒

【明報專訊】特首選舉進入倒數階段，候選人曾俊華近日都無咩公開活動，不過面對網民就唔懶惰，噚日就密密發帖同網民交流，包括接受親子網站訪問講湊仔經，大談當年由美國回流返港，原來好大原因都係為咗一對仔女，佢形容自己同仔女關係親密，佢哋去海外升學前都每晚一齊食飯，現時仍堅持每周一次同家人相聚。


曾俊華話，無從得知如果繼續留喺美國，仔女會變成點，但其實都唔重要，因為過程比結果重要；又話勇於嘗試，不問結果，但求快樂；呢個係佢嘅信念，亦係佢對孩子嘅身教。唔知呢個係咪都係佢今次嘅選舉格言呢？


話香港人唔係「忽然愛港足」

曾俊華又上載薯片造型飯團飯盒，話係競選辦同事日前外賣嘅10個「特別造型飯盒」，出自一個網上烹飪導師之手，形容賣相吸引，味道唔錯。佢話好多民間高手唔再只依賴傳統媒體宣傳，亦喺網上建立事業，仲話網上生活已日漸同現實生活融合，政府如要充分掌握民情，必須摒棄「上網就是Hea」、「返工上FB一定是偷懶」等落伍觀念。


佢對手林鄭月娥日前去探港足操練，曾俊華fb就舉例話，香港人唔係「忽然愛港足」，形容港人撐香港足球，從網上醞釀、發酵、爆發到變成廣泛信念，係典型嘅網絡民情。


曾俊華仲出post介紹競選團隊內嘅聯絡事務成員，又提到噚日朝早喺工聯會榮譽會長陳婉嫻陪同下到訪黃大仙上邨，與一班老街坊見面。特首候選人仲有胡國興。