唔知田二少係咪建制 林鄭話都係講笑

【明報專訊】特首候選人林鄭月娥早前接受報章訪問時形容「其實我本性都係有幽默感同埋幾好玩嘅人」，原來林太亦成日講笑，不過其他人聽完佢嘅言論，就未必覺得太好笑。Emily聽聞，新民黨上周六同3個特首候選人見面，其中林太嗰場，新民黨副主席田北辰就問林太去年點解要公開批評佢，林太就回應話批評田二少都係「講笑」喎。


上周六會新民黨 二少重提舊事

有新民黨中人透露，田二少會上問林太知唔知自己民望低係咩原因，林太就回應話因為佢上屆喺政府處理唔少爭議事件。田二少就反問林太，會唔會考慮吓，其實民望低可能同佢政治敏感度不足有關，仲舉例重提舊事，指林太上年曾公開話田二少「唔知建制定泛民」，其實會令人聽完對林太好有意見。林太就回應話，當日嘅說話其實係有「講笑成分」，仲叫二少唔使太認真。


話說上年4月扶貧委員會商討修訂貧窮線，內容喺開會前就被傳媒報道，而時任政務司長兼扶貧委員會主席林太見記者時，話扶委會無任人唯親，委員來自不同界別，「有泛民同建制議員，不過田北辰，有時都唔知佢係建制定泛民」。Emily就呢個說法向田二少求證，佢證實林太的確喺新民黨會面上有回應事件，形容當日只係「講笑」。


林太都唔係第一次講笑，佢本月初出席記協座談會時曾形容港台電視「唔掂」，幾日後就澄清其實話港台唔掂嘅說法係「少少講笑」。特首候選人仲有曾俊華同胡國興。