外交部公署fb 3人按掣開通 網民留言﹕想有公平特首選舉

【明報專訊】「中華人民共和國外交部駐香港特別行政區特派員公署」嘅facebook專頁，前日（21日）正式開啟，署理特派員佟曉玲仲話會「積極回應網民關切」(口添)。專頁引嚟網民踴躍留言，部分人希望有公平公正嘅特首選舉，仲有網民留言「我要真普選」、「平反六四」等。
公署﹕積極回應網民關切
開fb當日佢哋仲有個「臉書官方賬號開通儀式」，由佟曉玲、副特派員胡建中及宋如安「共同按下按鈕，推送首條貼文上線」，佟曉玲仲話佢哋將「積極回應網民關切」。
專頁好快已拎到「藍剔」認證，截至噚晚7時，大約有800個讚好。有網民就質疑專頁嘅真偽，專頁回覆留言話﹕「真過珍珠，都係希望幫到大家姐（啫）」、「係（真的專頁），如假包換！！」
其他網民留言包括「我要真普選」、「平反六四」，有網民關注近日嘅特首選舉，希望公署藉專頁認清香港民情咁話，亦都有網民貼上某個候選人嘅改圖。Emily仲見到香港眾志秘書長黃之鋒喺專頁留言：「撤回人大決定，落實民主普選，中共停止打壓！」Emily見專頁有好多政治敏感嘅留言，暫未見有含粗言穢語留言。
專員噚日更新咗幾次，包括更新封面照片、分享公署嘅香港攝影作品，仲分享咗《明報》一則有關消防員殉職嘅即時新聞，公署嘅帖文就繁體字同簡體字兩者都有用到。