標語鬧「肥胡」 終於真相大白？

【明報專訊】特首選舉日臨近，近日有人喺中環遮打花園附近見到，有人貼街招鬧「肥胡心術不正」界票，Emily於是去問人稱「肥胡」嘅政協常委胡定旭八卦一下。呢位肥胡思索咗一陣，就話終於「真相大白」，唔關佢事！
講到界票 胡定旭：應指胡國興
其實早前已經有人喺佐敦街頭貼街招，寫上「大敵 當前 肥胡 暗助 CY 2.0」嘅標語，而胡定旭有提名林鄭月娥，咁唔知呢啲批評說話係咪針對佢，佢都一頭霧水。不過，肥胡話見埋噚日中環嗰張街招，佢就明白呢啲說話，唔會再對號入座，因為講到「界票」，佢相信被點名嘅「肥胡」，應該係另一名身材肥胖嘅特首選舉候選人「胡官」胡國興喎，胡定旭認為係曾俊華、林太及胡官競爭，殃及池魚啫。