有推測料留任政府 CY：你認為呢啲係新聞？

【明報專訊】特首梁振英（CY）唔競逐連任後，早前已晉身國家領導人級別，擔任全國政協副主席，近日就有專欄、評論預料CY或會出任政治顧問留任下屆政府，甚至有機會成為中央港澳工作協調小組成員。噚日CY出席行政會議前見記者，就被記者問到點睇呢種新聞或評論，究竟係真係假，CY第一句就反問：「你認為呢啲係新聞？」，其後簡單答咗一句「不是真的」。
其後答「不是真的」
至於如果獲下屆政府邀請，會否以任何形式留任決策職位，CY指無咁嘅消息同計劃，至於有無機會留任、係咪願意，CY亦只簡單回應「純屬揣測」。
辦公枱文件：努力工作就會少
周日由選委籌辦嘅選舉論壇中，特首候選人林鄭月娥話對手曾俊華辦公室枱面「乜嘢都無」，惹來大家熱議，噚日亦有記者問CY，佢嘅工作模式係點？CY就話自己忙嘅時候，有一個議題文件特別多時，枱上文件就會多；出去公幹、放完假返工，文件亦會多，努力完成後文件就會少啲，「所以這是沒什麼意思的問題」。
有記者問及點解香港無出現「香港營」，CY回應話佢上屆當選後，確實努力爭取選舉時無支持佢嘅人支持。