網媒3．26無得入點票站傳媒區採訪

【明報專訊】近年唔少網媒出現，但佢哋採訪都受到一定限制，好似政府總部同政府搞嘅記者會、活動等，都未能進入。特首選舉係大新聞，早前唔少網媒都再向政府爭取，希望3．26周日特首投票日，網媒可以進入點票中心嘅傳媒區採訪，同其他傳媒看齊。不過佢哋就得唔到好消息喇。


新聞處：可留公眾區

立法會議員莫乃光早前就此事去信政府，噚日獲政府新聞處長回信，信中指政府新聞處接受早前申訴專員公署嘅建議，正積極檢討傳媒採訪嘅登記安排同準則，但指目前自稱為媒體嘅網站眾多，性質各異，呢類網站係咪都可以歸類為傳媒機構不無爭議。


處長話，檢討工作未完成，所以特首選舉日仍會維持現行嘅採訪安排，又指網媒仍可以喺點票站嘅公眾區域得悉選舉最新消息。


另外，上星期六建築師、園境師、規劃師同測量師4個學會舉辦選舉論壇，並邀請傳媒到場採訪，仲向傳媒公布論壇詳細流程，點知一眾記者到場後，大會就話論壇閉門進行，仲叫記者睇facebook直播，搞到成班記者集體離場表達不滿。4個學會噚日就發聲明，話當日採訪通知無說明活動係閉門進行，令傳媒誤解，對此深表歉意，強調尊重傳媒採訪工作，日後會加強溝通。