洪拳高手拍片：曾俊華剛柔並重

【明報專訊】曾經講過自己「幾打得」嘅特首候選人曾俊華，噚日喺facebook上載最新一段「拍住上」短片，搵咗兩個武林高手林鎮輝（右）同趙式慶（左）撐場。林鎮輝係曾俊華修習洪拳嘅師伯，趙式慶就係曾俊華嘅同門師兄弟。


趙世光幼子趙式慶話，一套工夫要打得好，一定要剛柔並重，就好似人生一樣，指人生係一場障礙賽，喺唔同環境就要用唔同嘅方式、步伐同呼吸去應對。佢話，喺曾俊華身上正正就見到剛柔並濟嘅特點。林鎮輝就透露，曾俊華最近都仲有練洪拳，「佢仲想搵啲軍器，自己都仲有練習」。


曾選舉論壇講「盧海鵬試咪」

另外，曾俊華不時被形容性格風趣幽默，原來佢前日出席選舉論壇，喺論壇前試咪時，就講咗句「盧海鵬試咪」。競選辦義工羅永聰叫佢「要試一試回音」，薯片初頭就問「點試回音啫」，然後就壓低聲線講「盧海鵬試咪」。兩個人隨即偷笑。