候任特首辦秘書長丁太　如林鄭「失散姊妹」

【明報專訊】星期日就係特首選舉投票日，政府噚日公布，委任原郵政署長丁葉燕薇出任候任特首辦公室秘書長。好多網民一睇丁太嘅樣，都大呼佢同特首候選人林鄭月娥好似樣，有人形容係「失散嘅姊妹」，甚至係真正嘅「林鄭2.0」。
與陳甘美華「如三姊妹」
唔少網民仲發現，上年先退休嘅民政事務總署前署長陳甘美華，其實都同林太好似樣，好多網民話，如果佢哋3個企埋一齊，真係猶如三姊妹合照咁(口添)。有網民仲講笑咁話，如果下次林太唔得閒去天水圍，或者可以請丁太代勞。有網民噚日就將3人嘅相併埋一齊，唔少人都被3人嘅相洗版。
查番資料，3人之中丁太年紀最細，1963年出生嘅佢今年54歲，林鄭月娥就1957年5月出世，未過生日芳齡只係59歲，至於陳太就1956年出世，如3人真係姊妹呢，陳太就算係大家姐喇。