開支埋單80萬 齊心辦論壇 建制泛民感欣慰

【明報專訊】由建制同泛民選委合作搞嘅特首選舉論壇前晚大功告成，論壇喺機場亞博館舉行，據Emily所知，今次場租、音響廣播及保險等各項開支，埋單大概用咗80萬元。有份籌備嘅建制及泛民代表，事後喺手機通訊群組向各人發表感言，話今次大家齊心合作，如果第時各方都肯用咁嘅態度相處，咁社會就和諧好多。


有份籌辦論壇嘅選委林宣武話，選委間夾錢辦大事，有人捐幾百、有人出幾萬元，大家都有心去做事。佢話社會雖然撕裂，但事實證明如唔同派別嘅人一條心，仍然做得成功，話論壇公平公開透明，各方都接受。


泛民代表莫乃光就話，今次最大挑戰係喺好短嘅日子裏面，各方合作搞到咁大型嘅論壇，涉及唔少義工及唔同黨派嘅人合作。


佢形容今次論壇都算順暢，只係有少少超時，而最蝦碌嘅係抽籤揀選委提問時，抽中咗一張提問表，上面字體潦草，連梁繼昌都以為係「Linda Man」，當時大家都話要嚴謹啲，唔想隨便DQ人嘅提問機會，要搵番呢個提問人出嚟，事後大家先知道呢位「文小姐」其實係司馬文（Zimmerman）；司馬文事後都喺fb post番呢段片，仲自我抽水話「細個掛住玩唔練好手字就會係咁」喎。