張國鈞為林鄭解畫：我都係屯門大

【明報專訊】特首候選人之一嘅林鄭月娥之前被指因為「攰」而取消去天水圍視察，林鄭競選辦人員張國鈞噚日喺《城市論壇》就事件解畫，話天水圍係香港重要一部分，林太想出席活動，但溝通不足出現誤會，林太今個星期會同相關團體見面。


「天水圍係香港重要部分」

元朗商會中學學生噚日喺論壇上點名問張國鈞，話張以愛國愛港標準揀特首，佢就質疑天水圍係咪唔係香港一部分，係咪唔計香港市民。張國鈞就話「我都係屯門大」，形容位處新界西嘅天水圍係香港重要一部分，「不可能不關心」，呼籲同學們客觀啲，要睇候選人過去整體表現，佢承認選舉工程中應避免甩漏，最緊要將來避免再發生。


莫乃光：問題出現賴公關

同場出席嘅立法會議員莫乃光話，林鄭入天水圍有司機接載，由中環出發，大約半個鐘車程，「唔同大家坐巴士咁辛苦」，問題出現後就賴公關，可見到佢承擔同領導能力係點。另一候選人曾俊華前日就走訪荃灣、尖沙嘴等4個地方，facebook上就有人留言「去天水圍吧！」，曾俊華除咗親自回覆留言，話上星期已經應邀去咗天水圍、貼番舊相證明。


特首選舉候選人包括曾俊華、林鄭月娥及胡國興。