襟章紀念品 包括小黃鴨 張建宗鼓勵自發慶回歸

【明報專訊】今年係回歸20周年，政務司長張建宗噚日發表網誌時，率先公開咗襟章紀念品嘅設計，襟章印上之前推出嘅6組「HK20」創意圖像，包括工業家林亮喺1948年創作嘅小黃鴨。司長仲話，為慶回歸製作咗一首主題曲，但要先賣關子，唔知首主題曲又會唔會好似10年前首《始終有你》咁令人耳熟能詳呢。


20周年主題：同心創前路 掌握新機遇

司長話，今年慶回歸嘅主題係「同心創前路，掌握新機遇」，英文係「Together．Progress．Opportunity」，所以特別注重全民參與，將會舉辦一連串活動，如探訪30萬戶家庭，關懷弱勢社群、少數族裔同傷殘人士，又會鼓勵民間團體自發搞慶祝活動，當局家已經收到超過200項慶回歸活動嘅申請。


張建宗話，嚟緊會安排香港藝術團體，到不同城市演出超過120場文藝表演同設計展覽，國際著名時裝設計師譚燕玉（Vivienne Tam）就率先喺上個月紐約時裝周，舉行咗一個展現香港特色嘅時裝表演，大獲好評。


100年輕人任活動大使

張建宗又話政府好重視青年人嘅發展，所以招募咗100個年輕人做20周年慶典活動青年大使，等佢哋幫手接待外賓、推廣香港。