筵開50席 司局長唔見影 白鴿黨慶 卿姐一曲吸40萬

【明報專訊】民主黨噚晚喺九龍灣舉行22周年黨慶酒會同籌款晚宴，筵開約50席，籌到超過760萬元。前主席劉慧卿（卿姐）「吸金力」不減，佢噚日喺晚宴開金口唱一首《上海灘》，已經為民主黨籌到40萬元，不過卿姐笑住話﹕「40萬太少！搵多啲返嚟。」現任主席胡志偉不甘示弱，獻唱《萬水千山縱橫》同《新鴛鴦蝴蝶夢》，亦籌到超過15萬元。
酒會同晚宴一如往年星光熠熠，曾俊華、林鄭月娥和胡國興3個特首候選人都有畀面出席酒會，不過佢哋並無交流，只係分別同現場政商人士「打牙骱」。除咗各大泛民、建制政黨代表，立法會前主席曾鈺成、蘭桂坊集團主席盛智文、行會成員羅范椒芬，同刑滿出獄冇耐嘅前全國政協委員劉夢熊，都有現身酒會或晚宴，不過就無司局長到場。
酒會上，劉夢熊分別同曾俊華、胡國興傾偈，佢寄語民望領先嘅曾俊華「得民心得天下」，又話對方「綿裏藏針」，曾俊華笑笑口回應：「我唔識呢啲嘢。」
林鄭挖角捧紅 阿聰成集郵對象
今年籌款晚宴無拍賣環節，各立法會議員就拍短片模仿電影情節娛賓，其中尹兆堅扮拳手，就引嚟全場歡呼尖叫聲，現場亦設有「即影即有」自拍櫃位，畀出席者影相。至於幫曾俊華助選、仲畀林太喺論壇上公開稱讚同挖角嘅前財政司長政治助理羅永聰，就成為晚宴其中一個焦點，好多人爭住同佢影相。