有相為證 「金刀梁」寶刀未老

【明報專訊】港大醫學院踏入130周年，歷來孕育過唔少名醫，醫學院為咗慶祝「生日」，舉辦《大醫逸照》攝影展，今日起至29日喺中央圖書館展覽館展出。相展邀請攝影師謝至德操刀，佢由2015年9月開始，花咗超過600小時，跟住29個醫學院教授、舊生同醫科生，拍攝佢哋嘅日常生活。醫學院院長梁卓偉話，希望透過今次攝影展，反映醫生工作時面對嘅挑戰，同埋除低白袍之後嘅另一面。


好似有「金刀梁」之稱嘅港大校委會前主席梁智鴻，以為佢公職繁忙好難抽身，估唔到仍然有執刀做手術。梁智鴻講笑話，自己幾乎日日都開刀，「唔開刀邊有飯食？」不時主持醫務聆訊嘅港大精神醫學系榮休教授麥列菲菲，亦係相展其中一個主角。麥列菲菲話，最鍾意同一對孫仔孫女影嘅相；相裏面佢抱住孫女，笑到見牙唔見眼；另一張相就見佢搭港鐵，佢話由屋企去到中環診所，港鐵最方便。


《大醫逸照》攝影展之後仲會去到賽馬會創意藝術中心、醫學博物館等場地巡迴展覽。詳情可瀏覽http://130.med.hku.hk。