「有安全風險」 北京工展會禁賣魚蛋

【明報專訊】今年係回歸20周年，廠商會計劃6月底首次去到北京辦工展會，當做慶回歸活動，但呢單嘢原來幾複雜，據知中央曾經對呢項活動「開紅燈」，勸佢哋唔好搞，但廠商會會長李秀恒話，佢同前會長施榮懷呢兩個政協，同埋其他同事合力，花盡力氣終於爭取到可以搞。不過，北京京畿重地，當局列出N不准規矩，包括唔准賣魚蛋、唔准藝人方力申等人去唱歌表演、唔准搞展覽，原因係群眾聚集超過10分鐘會有安全風險！


李秀恒噚日喺傳媒聚會話，想趁回歸20周年移師北京搞工展會，但估唔到審批難度咁高，佢哋年幾前已開始籌劃，但當局一度勸佢哋唔好搞，因為北京咁多大事要搞，例如有一帶一路高峰會，有多國元首到訪，北京市政府又換屆等，幾經周旋，中央最後先肯開綠燈。


「特色可能係無特色」

負責項目嘅副會長戴澤良就話，由於北京當局好關注安全問題，唔想有市民聚集超過10分鐘，所以列出N項規矩，例如唔想有熟食檔，怕有人企喺檔前食魚蛋，所以家好頭痛，唔知「奶茶王」活動可唔可以搞到。所以當大家問佢北京工展會有乜嘢特色，佢講笑話「特色可能係無特色」。


戴澤良話，北京農展館場地有200個檔位，但喺北京成本貴限制多，家仲有近100個檔位未租出。不過距離6月仲有時間，佢對租出檔攤同到時嘅生意都樂觀，亦會同當局繼續商討咁話。