財爺運動場聽湊仔經 嘆家長唔易做

【明報專訊】曾俊華喺本月12號宣布辭去財政司長一職，至今中央仍未批准，近期就見佢不時周圍去，又寫吓facebook。噚日係聖誕節最後一日紅假，天氣又好，曾俊華就同太太去咗香港「後花園」西貢，話要吸吓新鮮空氣咁話。


曾俊華喺facebook上載咗幾張相，佢話去西貢食咗生猛海鮮，又順道欣賞特色小店，收穫豐富。飯後佢仲走去將軍澳運動場，同一班年輕家長交流，由教育、工作再講到養育子女，曾俊華話佢哋畀咗好多寶貴意見，令佢明白今時今日做家長真係唔容易。