覆核文件唔送議辦掛家門 長毛斥律政司小家

【明報專訊】社民連立法會議員梁國雄（長毛）早前被律政司入稟挑戰議員資格，長毛噚日喺facebook上載短片，話前晚返屋企嗰陣，發現家門有一封以尼龍繩掛上、有關宣誓司法覆核案嘅律政司法律文件，質疑律政司因為唔承認佢議員身分，所以唔將文件送到佢嘅金鐘立法會辦公室，批評此舉「好奇怪」，反問「有無小家啲啊？」

據知，法律文件提到長毛喺宣誓前後叫口號，加上宣誓時有停頓、舉傘同撕爛人大就政改8．31決定嘅道具，所以律政司認為佢唔莊重同唔真誠宣誓。長毛喺帖文話，律政司以往控告佢，都係將文件送到立法會辦事處，但自己上星期五已經試過喺家門前發現律政司寄嘅文件，只係當時無影低。


律政司：做法正常

律政司辦事處位於中環同金鐘，距離立法會唔遠，點解要舟車勞頓過海去九龍灣、即係長毛住所送文件呢？律政司發言人唔評論個案，但就話有關呢次案件，律政司送達法庭文件嘅處理同一般情况無異，當中無其他考慮。發言人強調，就法庭文件應該送去邊度或用邊種方式送達，律政司首要考慮係適用嘅法律同規則要求，一般而言，有關法律同規則容許法庭文件以不同方式送達。