有心人成功爭取 快餐店收銀員有櫈坐

【明報專訊】大埔區好人好事多，繼早前出現嘅社區公共籃球後，大埔街坊、本地藝術家程展緯留意到有連鎖快餐店無為收銀員安排櫈坐，就向快餐店經理反映，事隔幾日，發現快餐店增設咗張櫈畀收銀員。程展緯仲喺自己facebook留低其他快餐店電話，希望更多市民幫手出聲，關心佢哋嘅需要。


收銀員長時間企喺收銀機前工作，程展緯喺fb形容佢哋好似係被困喺一個細小空間罰企嘅黑熊，身體被剝削而勞損，佢日前觀察大埔多間快餐店，發現只得兩間無提供櫈畀收銀員坐，遂決定同經理反映情况。


佢同Emily講，當時經理都笑笑口咁話自己做過收銀員，真係會辛苦，所以應承佢會同上頭講。噚日朝早程展緯就發現「收銀椅子」開始運作，於是上網大讚快餐店代言人、藝人杜汶澤「好嘢」，仲希望仍未有「收銀椅子」嘅快餐店盡快跟進相關情况。佢又話，關顧勞工嘅事，任何市民都做到，而之前睇到有關勞工嘅調查，發現好多勞工唔太識反映自己感受同權益，「大家都打工，出句聲都係舉手之勞，我放咗工咪支援其他工友，幫佢出聲囉」。