朱凱廸駁梁君彥 「唔好假惺惺」

【明報專訊】立法會議員朱凱廸去咗英國跟進主席梁君彥棄英籍嘅事，梁君彥反而話好開心，希望朱幫手還佢公道；但朱凱廸噚日朝早越洋接受商台電話訪問時反駁，叫梁君彥唔好假惺惺。


梁君彥棄英籍風波末了，佢上星期三（12日）展示有英國內政部蓋印嘅棄英籍文件，但仍被質疑有問題，身在英國嘅朱凱廸就話正因為梁君彥唔坦白，先要去英國搵真相，「希望梁君彥唔好假惺惺」。佢仲喺節目上透露，英國內政部回應話唔評論事件，「睇嚟英國政府呢一面唔係好理我哋」。佢話現時希望多啲同英國媒體、政界接觸，將問題帶到英國政圈討論，令英國政府願意提供更多資訊，亦希望透過在野工黨於國會質詢，「希望有具體答案出到嚟」。