「饑饉三十」訪柬 不再揮霍買波鞋

【明報專訊】今年「饑饉三十」將於4月9至10日舉行，只要完成30小時嘅饑饉活動，並提交相關作品，就有機會參加8月嘅柬埔寨考察團。24歲嘅葉承杰2010年首次參加「饑饉三十」，喺營中模仿耕種過程嘅工作坊體驗農民辛勞，「之前淨係知非洲好窮」，但身邊朋友大多只顧享受物質，叫佢哋捐款支持，只會換來一句：「傻嘅咩，畀錢入去捱餓30個鐘，點解唔去食餐好？」


任職幼園 望以身作則教學生

去年5月葉承杰獲甄選到訪柬埔寨Baribour地區，最深刻嘅係其中一個貧困家庭，「佢哋間屋個頂用樹葉鋪成，有好多洞」，每逢落雨就漏水。回港後，承杰一改揮霍買波鞋衣物習慣，「以前冇諗過自己得一對腳、一個身，唔會著得落（咁多）」。


28歲嘅蘇鈺宜參加「饑饉三十」8年，去年同樣往柬埔寨考察，佢話相比以往喺香港間接了解窮國境况，親身體驗衝擊更大。佢憶述當地建設較落後，無鋪水喉，冲涼時只能從滿載樹葉同蜘蛛嘅水桶中盛水解決，覺得港人活在先進嘅城市好幸福。蘇任職幼稚園，佢以身作則，希望培養學生從小珍惜食物。