中學「寫字最醜」 譚志源慶幸書法非TSA

【明報專訊】政制及內地事務局長譚志源、教育局長吳克儉、行政會議成員羅范椒芬等，噚日出席「習書遊藝，正己修身——羅澄波書法展」，譚志源喺致辭時就自爆，話喺中二上中文課時，中文老師喺冇事先通知下搞班內書法比賽，勝出者會獲獎。過咗一段時間，老師喺班中頒發冠亞季軍，佢就話自己獲得咗額外新增嘅「特別大獎」，獎品係一本書法字帖，因為老師認為佢手字係全班最醜。佢笑住咁講，「以前教學方法係咁，好彩當時書法唔係TSA」。


昨獲讚字靚 譚﹕佢可做問責官員

譚志源又講到政府以前派佢哋去清華大學進修，佢就選擇咗書法做課餘課程，用咗4星期學寫個「一」字。後來喺3、4年前，佢去參觀深圳前海地盤，對方喺會議後要求佢題字，與會者仲用期盼嘅目光望住佢，而佢只係識寫個「一字」，咁最後就寫咗「一日千里」。


譚志源話，噚日入場時大會要求嘉賓用毛筆簽名，佢形容「寫完標晒冷汗」，但獲接待處嘅工作人員稱讚，「好靚啊啲字」。譚講笑話「佢（工作人員）可以做下一屆問責官員」。


呢個書法展覽共展出羅澄波110幅作品，喺中央圖書館展覽廳舉行，展期至聽日（19日），費用全免。