高佬賢做老竇 要靠陳恒鑌？

【明報專訊】民建聯立法會議員何俊賢（高佬）喺2014年底結婚，噚日喺立法會派利市，大家都祝佢早生貴子。高佬就好坦白咁講呢件事「做緊」，即係計劃中喎，但唔知幾時成事。講到生BB，佢就話搵咗好友陳恒鑌（Ben）「幫手」。


介紹中醫調理太太身體

高佬就話，阿Ben太太正懷第二胎，下個月就出世，阿Ben呢方面好有經驗，所以搵阿Ben介紹咗個中醫畀佢太太，而太太家會去睇醫生，先調理好身體，懷孕一事順其自然。Emily就祝高佬努力做人，明年可以賺利市錢。