讚梁特「掌機遇 作抉擇」 林大輝意有所指

【明報專訊】做咗兩屆立法會工業（二）議員林大輝，過去一直唔表態講係咪再參選，噚日佢同傳媒聚會，都肯講多兩句，話自己一直有心從政，係咪參選要視乎政治環境、時機等。但佢話做議員同期望有落差，家建制派嘅工作只係為咗砌夠人開會，佢唔鍾意咁，所以每次流會佢都上榜做缺席議員。大輝表明，如果議會繼續拉布，就唔值得再做議員。


本身係教育事務委員會主席嘅大輝話，覺得國民教育、公民教育一定要做好，但「如果叫（教育局長）吳克儉搞，不如唔好搞，一動不如一靜」，咁咩人適合搞呢？大輝就笑住話最重要「所託啱人」，無論係副局長楊潤雄定其他局嘅副局長，都會搞得好過吳克儉，佢又話非常擔心吳克儉下屆會連任局長，仲擔心過自己有無得做議員，如果民望負43個百分點嘅吳克儉都可以連任，咁佢都唔知咩係問責精神。


對於特首梁振英，大輝噚日大讚對方好識得「掌機遇，作抉擇」，仲舉例話對方點樣識「掌機遇」，特首選舉時搵劉夢熊喺唐英年大宅門口派單張；當選後就「作抉擇」，唔搵劉夢熊做行會成員。