梁家傑跌出「十大議員」 陳偉業上榜

【明報專訊】港大民研計劃最新「十大立法會議員」評分調查，立法會主席曾鈺成繼續名列前茅，係自2013年4月起連續第12次，而政壇嘅田氏兩兄弟，即係哥哥田北俊同細佬田北辰，位置不變繼續排名第二同第三，民主黨主席劉慧卿上升兩位排第四，新民黨主席葉劉淑儀跌一位排第五，工黨李卓人、民主黨何俊仁及社民連梁國雄各上升一位排名第六至第八，人民力量陳偉業再次上榜排名第九，黃毓民就位置不變排名第十。要躋身「十大議員」嘅先決條件係巿民嘅熟悉程度，然後再按支持度排名，而呢個調查喺1月份做嘅。


9人蟬聯 評分遜往年

民研計劃高級數據分析師戴捷輝分析，對比3個月前，以熟悉程度計，公民黨梁家傑跌出十大，由陳偉業代咗。若計絕對評分，全部9個連續上榜議員嘅評分都下跌，當中，曾鈺成、田北俊、田北辰、葉劉淑儀及何俊仁嘅評分跌幅都超過抽樣誤差。