「筍盤」巧．岸居 「實呎係建呎3倍」

【明報專訊】年輕人高呼上車好難，但近日有個主打「屹立於都會中心」、「實用面積是建築面積3倍」、「獨享交通匯萃優勢」嘅「樓盤」推出，受網民垂青。呢個「筍盤」位於火炭，名叫「巧．岸居 Idiot Ville」，但可惜個「筍盤」已經「摺埋」——其實呢個只係本地平面設計公司Paper Scissors Stone設計嘅惡搞樓盤，係設計師為咗諷刺本港土地問題而策劃嘅項目。


藝術品惡搞土地問題

「巧•岸居」係Paper Scissors Stone參與藝術村「伙炭」開放日嘅展覽。「樓盤」號稱「一書三房、樓底無限高、實用面積是建築面積3倍」，設計師阿山笑言，呢個其實係一本超巨型立體紙皮書，每換一頁就會出現一間新房間，包括飯廳、客廳同睡房連書房，所以實用面積唔會受建築面積所限。


阿山話﹕「政府成日都話香港正面對土地問題，規劃時又會將土地撥予發展商發展豪宅，於是我哋就決定用一個好有趣嘅方法，將展覽包裝成豪宅feel，宣傳片同廣告都極像真，以諷刺呢個荒謬情况。」佢話取名「巧．岸居」，除咗反映社會狀况外，亦係自嘲一班人用兩個月時間做出一個連宣傳品都極認真嘅紙皮屋，不過有關展覽前日已經完結。考唔考慮重展？阿山話紙皮揭來揭去易有損耗，要再研究情况睇睇係咪可行。