嫻姐叫鍾國斌行開啲

【明報專訊】政府推出退休保障諮詢，內容令勞工界好唔滿意，商界近日不停舉辦座談會，好似自由黨早幾日就請咗政務司長林鄭月娥同商界閉門會面，商界表明強積金對冲機制唔應該取消，否則商界好難經營。


工聯會陳婉嫻（左）唔單止嬲政府，更對近日頻頻就住呢個議題表態嘅自由黨鍾國斌（右）好有意見，嫻姐噚日喺立法會見到佢，就叫電視台搞個論壇，等佢兩個辯論吓。鍾國斌當然樂意奉陪，噚日兩人應記者要求合照，但嫻姐就笑笑口咁叫鍾國斌唔好企咁埋，場面搞笑。