中出羊子呻無人幫 入夜有「女僕」拉票

【明報專訊】油尖旺櫻桃選區候選人、主打城邦論嘅「中出羊子（網名昭明公主）」，選情不被看好，因為唔少人覺得佢太騎呢。但羊子喺facebook吐苦水，話為咗場選舉有唔少「犧牲」，包括呢個月淨係「睇過幾集一拳超人，同睇一集數碼暴龍」，其餘時間都係搞選舉，「一條友頂幾個人的工作……日日訓（瞓）得果幾個鐘……搞到自己病埋」，講明「我自問對得住天地良心」。


選舉日羊子不時喺fb吐苦水同發晦氣，話無人肯幫佢手拉票擺街站，「唔x做街站了……投票日都冇人黎撐場，心灰意冷，唔玩了」。羊子吐咗一輪苦水，入夜後就有幾個女仔，包括身穿女僕裝嘅後生女去幫手拉票。


袁彌明契細佬彈結他撐場

另外，今屆選舉有3個選美出身嘅女士參選，其中出選南區海怡西嘅人民力量主席袁彌明，挑戰爭取連任嘅新民黨陳家珮。袁彌明為咗令強烈嘅選舉氣氛加添輕鬆，邀請咗契細佬到場彈吓結他、唱吓歌。但噚晚就有本土派人士去咗海怡西踩場，炮轟人民力量同新民黨。