泛民坐住等特首 反駁超然 被當葉建源 李國麟窒CY

【明報專訊】中聯辦主任張曉明一句「特首地位超然」辣着唔少人，立法會前主席范徐麗泰曾以特首步入立法會時，議員需全體站立為例證明其地位超然；噚日答問大會上，部分泛民「身體力行」反證有關言論，決定喺特首出入會場時坐住等。


衛生服務界李國麟噚日喺答問大會，再拎特首口中嘅5歲細路「抽水」，佢話重陽節巧合地同細路重逢，有幾條問題想拜託問特首，例如特首係咪要刪除歷史，令有英國皇冠標誌嘅郵筒消失。特首梁振英（CY）回應時，將李國麟叫做「葉建源議員」，仲要人提醒先意識到，搞到李國麟串嘴咁話「歷史上我叫李國麟議員」。


創科局撥款 人力擬減議案

CY喺答問會不忘呼籲議員盡快通過創科局。財委會今日繼續討論創科局撥款，政府除咗補交泛民早前要求嘅文件，商務及經濟發展局長蘇錦樑亦約咗「拉布常客」社民連梁國雄、人民力量陳偉業及陳志全會面，人力態度亦明顯軟化，話會考慮減少提出議案。長毛就將政府披露更多資料歸功係佢哋拉布嘅成果。不過，民建聯葉國謙話其實文件無新意，只係畀拉布議員嘅「下台階」。