技巧體操精英 為兩餐做空少

【明報專訊】鞍馬、單槓呢啲競技體操就睇得多，但技巧體操你又聽過未？技巧體操主要有疊羅漢、拋接等動作，係2至4人嘅體育項目，亦係力量同美感嘅結合。全港只有30幾名技巧體操運動員，空中少爺許俊陞（Ernest，圖）就係其中一個。


Ernest喺9歲開始學技巧體操，16歲起代表香港參加國際賽。佢入職國泰前做過技巧體操教練，主力教國際學校興趣班，但工作時數唔穩定，遇着學校放假就冇工開，最慘試過一個月只搵幾千蚊。


Ernest感嘆技巧體操喺香港冇乜人識，政府支援唔多，做全職運動員唔容易，佢為咗生計，投身從小就有興趣嘅航空業。Emily聽聞空少工作時間唔穩定，佢話如果臨時有工作，只好同教練講練習改時間喇。


搭飛機成日遇到氣流，Emily諗到識體操嘅Ernest處理呢啲情况又有冇優勢呢，不過Ernest話未遇到呢啲特別情况，頂多只係幫吓同事拎重嘢喎。