劉鳴煒扮鬼 嚇到少女尖叫

【明報專訊】就嚟萬聖節，海洋公園近日每晚都有哈囉喂活動，一班嘩鬼喺園內嚇人，不過Emily就估唔到，連海洋公園董事局副主席、華人置業集團主席劉鳴煒都去客串，親身上陣扮鬼，睇呢個造型，加埋表情，似乎呢隻「鬼」都好專業，心血少啲都可能畀佢嚇親。劉鳴煒噚日就將佢扮鬼嘅相片擺上網，話佢盡力扮鬼，嚇到啲少女尖叫喎。


Emily聽聞，劉鳴煒會去海洋公園扮鬼7次，包括前晚，至於31號萬聖夜，佢當然唔會缺席啦。唔好以為扮鬼好簡單，據講單係化呢個鬼妝就要用超過1個鐘，落妝都要35分鐘。劉鳴煒為海洋公園都算親力親為，連工聯會立法會議員郭偉強都喺佢fb留言，大讚呢個富豪係「最有價值」職員。