陳茂波赴京上課兩周 學習「一帶一路」

【明報專訊】「一帶一路」係近期中國以至全球嘅熱門話題，但呢個話題真係好新，發展局長陳茂波都要上京「學習學習」兩個禮拜。立法會啱啱開番，堂堂局長竟然離港咁長時間，尤其係陳局長負起「覓地」咁大責任，真係會影響進度喎！唔怕，政府話局長會喺有需要時返嚟香港出席立法會會議。


茂波局長聽日就起行，去北京嘅國家行政學院讀「一帶一路戰略研討班」，為期兩星期，至10月30號。Emily翻查紀錄，發現高官訪京時間比較少兩星期咁長，但局長嘅新聞秘書話唔出奇，國家不時會舉辦各類型研討班，增加官員對內地認識，每次為期一至兩個星期，每日要上堂7、8粒鐘，課程密集，間中可能會有參觀活動，過去亦曾安排高級官員參加其他研討班。但今次只有局長上京，未有其他人隨行，新聞秘書話如果Emily有興趣局長學咗啲乜，可以等局長返香港後分享。「一帶一路」涉及層面好廣，特首辦回覆Emily查詢嘅時候，話只係派咗發展局長參加研討班，其他局長就冇參與。