CY中秋賞月談科技

【明報專訊】噚日中秋節補假，特首梁振英（CY）就喺政府網誌，上載咗一張前晚中秋夜月亮高掛禮賓府洋紫荊樹梢上嘅相。不過Emily睇真啲，網誌嘅內容完完全全同中秋無關，只係CY大談對科技發展嘅想法。


CY話過去兩日公眾假期與唔同部門有4場討論會，商討科技政策發展，佢覺得科技並唔係產業，係同人嘅生活息息相關，隨住網購、網上交易等等發展，要留意會唔會令網路堵塞而影響香港競爭力。


佢提到香港科技發展潛力同埋國內外嘅特殊優勢，受唔少世界一流科研機構重視，有啲機構仲想探討喺香港成立分支，CY前日就同美國一間大學嘅朋友見面，商討合作空間。任內強調要發展創科局嘅CY，認為科技會應用喺公共交通、醫療、教育等方面，政府部門要有發展嘅目光計劃吓未來。