家品店 賣佔領主題Tee

【明報專訊】仲有唔夠兩個禮拜，佔領行動就踏入1周年，無論佔中定反佔中，相信唔少人仍對其間嘅畫面歷歷在目，而且仲激發咗設計師嘅靈感。Emily噚日行經銅鑼灣家品店G.O.D.，見佢哋推出咗印有「I DID IT ON HARCOURT ROAD」嘅白底T恤，領口位置仲印咗「我佔領中環 I Occupied Central」字樣，意味深長，但價錢唔算平，每件290元。聞說呢件Tee係今個星期嘅新產品，預算售完即止，買三件有八折。


G.O.D.網頁就介紹呢款衫，上面指「夏慤道是香港一條貫通中區至灣仔的主要道路。去年它關閉了並常於媒體出現，造成了兩個月的交通延誤」。Emily想起佔中期間，創辦人楊志超曾經到訪金鐘佔領區，仲畀CNN做咗個短訪。當時佢拎住一張寫有「Mr. Chief Executive, please don't tear down this wall. It's beautiful.（特首先生，請勿拆去此牆。這裏很美。）」嘅memo紙企喺「連儂牆」前影相。一年後嘅今日，佢或許仍感觸良多。