譚志源放大假 「資深同事」幫住先

【明報專訊】唔少高官趁暑假休假叉吓電，早前特首梁振英（CY）放假但突然提早回港，家就輪到財政司長曾俊華放緊兩星期大假。政府噚日出稿，話政制及內地事務局長譚志源噚日下午開始亦離港休假至今個月30號，31號返工，放足17日。或者可能譚志源過去20個月搞政改，無乜點休息，過去一個月亦有唔少外訪，令佢都要放個長假唞唞。


副局長懸空 常秘都放緊假

自從有咗副局長同政治助理後，局長放假都會由副局署任，不過政制局隨住劉江華「升呢」做咗民政事務局長後，副局長至今懸空。噚日新聞稿話，譚局長休假期間，政制及內地事務局嘅資深公務員同事，會負責處理局內日常事務，局長亦會與相關同事保持溝通。


不過，其實政制及內地事務局常任秘書長張琼瑤最近亦放大假，常秘一職由副秘書長梁松泰署任，相信政制局或者認為短期內佢哋都無大嘢發生，所以最大幾個官員可以齊齊唞暑。