陳淑莊削髮明志 戰地醫生也加入

【明報專訊】和平佔中發起人戴耀廷、陳健民同朱耀明噚日同43個支持者一齊剃頭明志爭取普選，包括民主黨立法會議員胡志偉、漫畫家尊子，而喺芸芸剃頭嘅人當中，就有兩個女士嘅身影，佢哋就係公民黨副主席陳淑莊（Tanya）同埋曾經喺中聯辦門外剃頭聲援內地維權人士譚作人嘅Linda。Linda話，佢噚日仲收到譚作人嘅短訊，叫大家要繼續爭取民主。


Tanya講過有普選先結婚

唔少人噚日見到Tanya現身會場時都打咗個突，問佢係咪嚟打氣，當Tanya表明剃頭明志時，即喚起現場一片掌聲鼓勵。Tanya話，佢都係噚日朝早先決定加入剃頭行列，曾經講過有普選先結婚嘅佢仲講笑話，有人話人大落閘唔畀香港有普選，叫佢不如索性削髮為尼！


除咗Tanya之外，噚日唔少人都係即興參加，包括上星期先喺加沙返香港嘅無國界醫生歐耀佳，出任佔中醫療隊負責人嘅歐醫生話，佢都係噚日朝早跑步後先醒起下午有剃頭活動，所以即刻加入，返到屋企，老婆先驚覺佢變光頭佬！歐醫生笑言唔少同事都知道佢嘅政治取態，家信息更清晰，一睇髮型就知！