撐少訊 林鄭不談反佔中

【明報專訊】「保普選反佔中大聯盟」星期日舉行反佔中遊行，因為有問責官員簽咗反佔中表格，所以大家都關注當日會唔會有官員出席遊行。噚日政務司長林鄭月娥出席少年警訊40周年滅罪夏令營開幕禮，做主禮嘉賓，仲好有心去參觀營地，花咗近半個鐘睇少訊會員種花同整蛋糕。不過，面對記者追問會唔會去8．17遊行，同簽咗名反佔中未，林太就無回應，一支箭咁衝上車走人。


呢兩日林太出席活動，已對記者提問避之則吉。Emily嘅同事連日來都有向政務司查詢，司長林鄭月娥唔會唔出席8．17大遊行，但回覆都無明確講會抑或唔會。


保安局長黎棟國噚日都有出席開幕禮，佢喺致辭時大賣廣告，同一班同學仔講，相比起去外國參加暑假夏令營，少訊夏令營更加價廉物美。