財爺引述老友﹕港是中國軟實力

【明報專訊】財政司長曾俊華上個禮拜四去咗由荷里活道前已婚警察宿舍活化而成嘅中環「PMQ元創方」，參觀後令佢想起老朋友、藝術家榮念曾（Danny）早前獲頒授福岡亞洲文化獎儀式時講嘅一句話——「香港就是中國的軟實力」。財爺有感而發，指香港不止喺文化創意產業於中國別樹一幟，更深層嘅意義係，追求開放、公平價值觀，創新精神、擁抱東西方文化等嘅特質，同樣係中國軟實力嘅重要篇章。


追求公平 擁抱東西文化

財爺噚日以「軟實力」為題寫blog，力推香港創意產業。佢話PMQ元創方自從4月試業以來，已有50萬人次到訪，而PMQ係政府活化古蹟項目之一，用嚟做創意產業園地。


財爺跟幾個年輕創業者見面，令佢印象深刻。佢提到PMQ最年輕嘅創業家Jeffrey同Felix，兩人只有廿五六歲，兩年前喺理大畢業，同班同學中只有佢兩個選擇創業呢條窄路，自創品牌POMCH，將昔日工業生產元素融入設計意念，設計出獨一無二嘅塑料銀包同文件夾。原來兩人係以政府透過按揭證券公司提供嘅「小型創業貸款計劃」作啟動資金。不過，初嘗老闆滋味好辛苦，佢哋話一周工作7日，幸得一班同學支持，又不時幫手睇舖，兩個月來總算做到收支平衡。