商場出招迎世盃

【明報專訊】巴西世界盃下月12日揭開戰幔，本港多個商場密鑼緊鼓推出相關活動「應節」，其中上水廣場喺6月5日至7月13日期間展出多幅立體紙雕，由巴西紙藝師Carlos Meira人手製作，作品有5個「10號仔」嘅「10號傳奇」，包括巴西球王比利、法國施丹同阿根廷美斯；另一作品「新星乍現」就展示巴西金童尼馬同德國隊長拿姆等4個現役球員，宣揚比賽友誼第一信息。


奧雲下月東港城「上陣」

黃埔新天地就喺下周三至7月20日期間，於商場唔同角落展示朗尼、謝拉特同奧斯爾等12名球星嘅5呎高SoccerStarz Q版公仔。將軍澳東港城6月8日仲請到前英格蘭球星奧雲到商場助興。


Emily聽講除咗黃埔美食坊，新地嘅銅鑼灣世貿中心同東港城等多個商場，都會直播賽事同舉行睇波派對，賽事後會即場選出一個觀眾，有機會翌晨有專車送佢到返工地點喎。