按證搵阿信屋老闆教創業

【明報專訊】按揭證券公司（HKMC）有提供一項「小型貸款計劃」，專門為有志創業嘅人士提供資金。為宣傳呢項計劃，按證出版咗一本新書《創業營商錦囊》，邀請成功創業人士分享經驗，書中仲有銀行提供嘅信貸小貼士。


出埋書咁認真，宣傳方面當然唔可以馬虎，噚日按證就搞咗個新書發布會，仲請埋財爺曾俊華，同埋近排非常火紅、好多活動都爭住請佢嘅阿信屋老闆林偉駿（圖右）做嘉賓。財爺照稿讀完嚴肅嘅開幕致辭，就急急腳走咗人；反而林老闆分享創業心得就有唔少精警見解。


按證總裁李令翔做分享環節嘅主持，佢問林偉駿點解想由工廠轉型去做零售，因為零售行業已經有一啲「巨無霸」響度，好難競爭，而且租金又貴。林偉駿以佢一貫樂觀嘅態度話，佢只係按自己能力做生意，「唔係下下諗住去挑戰啲『巨無霸』」，同埋只要勤力啲做多啲生意，租金都可以攤薄嘅。


台下有觀眾問，想創業係咪要揀熟悉嘅嘢好啲？林偉駿笑答︰「真係識做生意嘅話，做邊行都得﹗」同埋至緊要係抱住對員工、供應商、業主都負責任嘅態度去做事。


email: piano@mingpao.com

[小琴密語]