唔認得袁國強 政總保安被上司罵

【明報專訊】添馬艦政府總部保安向來森嚴，企喺門外嘅幾個保安，只要見到無帶證嘅人出入，都一定會問吓咩事，確保無閒雜人等出現。辦公室本身喺金鐘政府合署嘅律政司長袁國強，唔知係咪少現身添馬，噚日去添馬同啲學者、時事評論員討論政改時，行到政總門口畀門口保安（左）截住佢問﹕「有咩幫到你？」


袁國強繼續直入，但呢個盡責保安就可憐喇，被上頭（右）責罵，批評佢點解連三司之一嘅袁司長都唔認得。在場記者見到呢個畫面，都戥被鬧嘅保安慘。


（劉焌陶攝）