管浩鳴「日軍侵略」喻佔中

【明報專訊】宗教界一直爭論應唔應該以佔中爭普選，聖公會教省秘書長管浩鳴噚日喺電台節目話，「神職人員唔應該做太踩界嘅事」。佢並以日軍侵略香港作比喻，「佔，occupy， 你諗吓我哋以前都會形容香港被日本『佔領』」，佢覺得「佔」係別人唔太願意嘅事，所以唔想鼓勵。佔中三子之一朱耀明牧師就隔空回應話﹕「一個政府或者掌權者係上帝嘅僕人，佢哋最高嘅守則係履行公義。」所以如果任何政府違反呢啲至高原則，都應受到譴責同糾正。


收回「邪教論」 話沒將佔中喻邪教

管浩鳴之前接受網上媒體訪問時話過，除咗邪教外，唔會有組織鼓勵違法行為。佢噚日喺商台《在晴朗的一天出發》上承認唔恰當，話願收回「邪教論」，澄清無將「佔中」比喻為邪教，亦不是想冒犯朱耀明牧師及陳日君樞機。不過，管轉頭就用日軍侵華做比喻。


被問耶穌都曾有反抗行為，違反當時律例，管浩鳴話「耶穌時代同現在距離好遠」，強調要以理性看待普選。佢仲叫大家考慮先接受一個唔太理想嘅方案，「特首只不過係5年（任期），好多時有調整空間」。佢透露，幾個月前曾經同中聯辦傾過對政改同佔中嘅意見，聲稱對方只係「收集意見」，並無鼓勵佢哋發表意見。


朱牧就喺另一場合隔空回應管浩鳴，話政府要行公義，否則應該被糾正。朱牧以《聖經》回應，話只有上帝掌權，所以「我哋唔會承認地上嘅政府係絕對權威」，佢強調法律本身係為人而立，「人民本身唔係為咗法律而存在」。