9日天氣登場 每日出兩次

【明報專訊】天文台噚日開始推出9天天氣預報服務，即係將天氣預報嘅時效由7日延長至9日，可以橫跨兩個周末，等市民可以更早掌握天氣變化，預先計劃活動，但準唔準就要留畀市民監察喇！Emily望咗一望，發現今日到下個星期四呢9日入面，只得兩日有陽光，大部分日子估計都會落雨，市民出門時就要記得帶遮喇。氣溫就會徘徊喺大約20至23℃。


新嘅9天天氣預報網頁，採用圖表形式顯示氣溫及濕度變化，方便市民查看，網頁亦加入相關氣候資料，以作比較。9天天氣預報內容包括天氣、風向、風速、溫度和濕度，會喺每日上午11點30分同下午4點30分發出。