伍綺琴心繫「五星級的家」？

【明報專訊】伍綺琴（圖）今個月底就離任碧桂園（2007）財務總監一職，攞過「最佳財務總監」嘅佢，上個月離職消息一出即刻滿城風雨，仲令到呢個「五星級的家」股價一陣波動。儘管公司出咗公告解釋伍綺琴係「私人原因」離職，做事一向有交帶嘅佢，噚日就廣發電郵同大家講byebye。


Estella（伍綺琴之洋名）話，離任後會小休一陣先，歡迎各方好友隨時搵佢，但小琴發現，佢留低嘅電郵地址，個名稱仍然有2007（碧桂園上市編號）呢個冧吧，莫非佢仍然心繫「五星級的家」？封郵件仲暗藏玄機話，相信好快同大家又會有交匯。小琴都好期待Estella重出江湖，同時亦好奇，如果Estella遲吓加盟另一間上市公司，會唔會改電郵地址呢？


[小琴密語]