食典 1： Hea食長洲　燒魚春香滿街

陽光與海灘、踩單車、 Chok樣影相、逗玩街邊小花貓，仲有隔九條街都聞到嘅燒魚春香……有無興趣跟 Phoebe同 Tina捐窿捐罅食人氣小食？呢檔篤一串，嗰檔喫一碗，你會發覺，平平無奇嘅長洲，原來好好 Hea。

記者：徐務研

攝影：陳盛臣

Model： Phoebe、 Tina

白天陽光與海灘



■踢水好無聊？唔無聊， Chok樣影張相掟番上 fb，大把人羨慕你。



■周日長洲海灘，真係多人到插針都插唔入。



■熱到跳舞？衝入海立即為炎夏降溫。



■好多貓周街走，呢隻貓連 Phoebe咁靚女都唔睬，好唔畀面喎。



■沙灘好熱，呢 Pair情侶肯定熱上加熱。



■踩有蓋單車衝呀衝，真係落雨也不怕，落雪也不怕。

燒乜春咁香？魚春！



好香，真係好香，香到隔九條街都聞到，必吃推介有「日泰小食」，以為聞到燒魷魚香，赫然發覺老闆娘萍姨燒嘅原來係魚春！膽粗粗試一塊，嘩，口感煙韌，魚春入口散開，一粒二粒非常有趣！萍姨之前喺碼頭擺街邊檔，不過政府規定夜晚十一點過後先准做生意，於是佢把心一橫開舖，至今有廿幾年歷史，堅持沿用傳統炭爐，份外香口惹味。

除魚春外，呢間舖仔仲有好多新奇乾貨可燒，連瀨尿蝦同大地魚乾都有，乾貨全部來自長洲漁民，我最愛鱔仔乾，超香脆，口感一流！同場加映第三代傳人──林小妹妹，裝模作樣幫手看舖燒魷魚，活潑可愛，謀殺唔少遊客菲林。

（長洲大興堤路 3號 9236 8857）



■萍姨乖孫林小妹妹出手燒魷魚，吸引勁多遊人影相。



■燒鱔仔乾每條$6



■燒黃花魚春 每塊$10起



■勁多選擇，連瀨尿蝦乾都有，花多眼亂。

無電雪條機， Magic！



夏日炎炎食番支雪條先，不過嚟得長洲，無理由入七仔求其買支雪條咁掃興，「花園雅座」絕對有驚喜！

只見老闆喪轉一個鐵盤，原來係泰國一街都係嘅雪條機，搞鬼在完全唔需要電力，果汁直接倒入細細支雪條筒，再放入裝滿冰塊嘅雪條機，人手轉十零分鐘，冰塊就會令果汁結冰凝固，原汁原味雪條立即有得食，真係學森美話齋：「 Magic！」

一機八種味道，當日香芋味最快賣光，芝麻味唔會甜過龍，細細粒芝麻極有口感。記住逢周六、日同公眾假期先開檔，唔好摸門釘。

（長洲東灣路 84號地下/9779 4934）



■將雪條筒放入水轉兩轉，卜一聲，雪條脫筒而出，食得！遊客小傑食到成嘴西瓜汁。



■泰式即製雪條$8

40吋水果串，夠長！



■檔口長期大排人龍，人氣爆燈。

嫌吃冰糖葫蘆 Old School？不如試試「洲啤工房」 40吋長冰果葫蘆，用菠蘿、蜜桃、西瓜、哈密瓜同提子等水果製成，絕非罐頭貨色，我親證檔口堆滿一箱箱水果，絕對新鮮。

熱辣辣巨薯棒又係正，薯塊比普通薯片厚身少少，即叫即製夠新鮮，自由添加味粉，濃淡自定，同樣有 40吋長，邊行邊食夠架勢。冰糕包係乜？即係雪糕版平安包，用印住「平安」兩字嘅冰皮包住花生碎同雪糕，食完平唔平安就未知，但肯定可以消暑。

（長洲東灣路 16號/9281 7755）



■巨薯棒$18



■冰糕包$15

自製手卷，老土但好味！



■故鄉茶寮係長洲第一間茶寮，得閒嚟呢度打躉嘆茶真係唔錯。

「故鄉茶寮」大排長龍，仲以為有甚麼新奇小食，點知係懷舊蟹柳手卷同腸仔手卷，好老實，自製壽司味道同高級日本料理當然無得比，但勝在夠窩心，夠老土。老闆娘係日本人，對食物一絲不苟，簡單手卷食到嘅係人情味同真誠意，紅豆餅同樣係熱賣小食，基本上十個遊客九個半都試過，熱辣辣紅豆茸唔會過甜，餅身做得軟熟，我畀十個讚，學生同長者有優惠減收一蚊，我畀第十一個讚。

（長洲教堂路 17號地下/2981 5038）



■左起蟹子手卷$15、蟹柳手卷$13、腸仔手卷$12



■紅豆餅$4

芒果腸粉，做得夠薄！

人氣糖水舖「允升甜品」雖然位處隔涉小窄巷，依然勁多人幫襯，最正係芒果糯米糍，選用新鮮呂宋芒，可惜太好賣，我遲來一步緣慳一面，好彩仲有個芒果腸粉止止口癮，腸粉皮有齊芝麻、椰子同綠茶三種口味，做得夠薄唔會搶去芒果的鮮甜，好味。

芒果綠晶亦不得不試，綠晶，即係綠茶水晶，用海藻粉同綠茶製成，比啫喱更爽口，加上清甜芒果，味道清新唔 Heavy，海藻粉有排毒美顏功效，貪靚女生點可以錯過？

（長洲新興街 3號/2981 5032）



■三色芒果腸粉三條$25



■芒果綠晶$20 手打魚蛋，入口曉彈！



■魚蛋$10

魚蛋都要推介？梗要！好味就一定要拮番串！老字號「甘永泰魚蛋」有廿年歷史，檔口一出碼頭行幾步即見，魚蛋用門鱔每天人手打製，特別彈牙，魚味十足唔會食到成口粉，細細粒好正斗， MK啲魚蛋係就係大串呀，不過大而無當囉。

（長洲新興街 106號地下/2981 3050）

紫米糕，味道自然！

講起糕點，不得不提「新照記茶餐小食店」，各式各樣傳統糕點之中，最出名一定係紫米糕，味道自然唔會甜到漏，細細粒紫米勁有咬口。想食得 Mix and Match一啲？得，整番件綠茶紅豆粟米糕啦，味道清淡，老人家必愛。

（長洲東灣路 18號/2986 9006）



■（左）綠茶紅豆粟米糕、紫米糕各$5



■食糕點 Out？不知幾多人排隊。

疑似金莎，係雪糕！



■香芒湯圓雪凍凍奶$24

天氣熱，邊個唔 Buy凍嘢？ Phoebe同 Tina極力推介「天然甜品」嘅香芒湯圓雪凍凍奶，雪凍即雪糕糯米糍，外層沾有芝麻、花生同朱古力，造型似金莎，咬落去係呍呢拿雪糕。香芒湯圓則用海藻粉同新鮮芒果做成，食嘅係清爽口感，賣相晶瑩剔透，睇到就想食。

（長洲大興堤路 9號海景樓地下/9095 8020）

魚仔餅，小朋友必愛！

俾「反斗奇冰」呢個舖名呃晒，仲以為賣乜冰物冰㖭，原來賣魚仔餅！魚仔餅買少見少，家喺長洲重現，外形可愛加晒分，有奶黃同紅豆口味選擇，熱辣辣出爐，味道唔會太甜膩，買畀小朋友，一定開心死。

（長洲大新海傍道 75號地下/2981 5078）



■魚仔餅$7



■咁嘅店名，點估到佢賣魚仔餅？



資料來源︰蘋果日報2011年07月07日