漢堡要全熟 食物溫度計幫到你！

世界各地都有唔少漢堡包嘅忠實粉絲，近年仲出現一啲「豪華風格」嘅漢堡包，標榜牛肉鮮嫩又juicy～🍔不過，如果包入面塊漢堡肉處理不當，食咗可能會影響健康㗎😰！

進食生或者未熟晒嘅免治肉類（例如漢堡肉），係人類由食物感染 O157:H7 型大腸桿菌嘅常見途徑。 O157:H7 型大腸桿菌嘅主要宿主係牛🐄，呢啲菌可能會喺屠宰動物或之後嘅處理過程污染肉嘅表面；而當肉被絞碎再製成漢堡肉，原本喺肉表面嘅菌就會進入肉嘅內部，進食未有煮熟嘅漢堡肉便有機會受感染。感染大腸桿菌出現嘅症狀包括腹痛、腹瀉，甚至帶血性腹瀉😨。嘔吐🤮同發燒🤒亦可能出現。有小部分人，特別係幼童同長者，仲可能會出現危及生命嘅疾病😱。

要避免以上情況，秘訣在於兩個字：全熟！冷藏嘅漢堡肉喺烹煮前應徹底解凍。漢堡肉要徹底煮熟，尤其係中心嘅部分，溫度最少要達到攝氏75度🌡️30秒，用食物溫度計量度就最可靠啦～～

—————————————

延伸閱讀

⧉　蘿蔓生菜及免治肉類中的O157:H7型大腸桿菌